Í vikunni byrjuðum við formlega á Comeniusarverkefninu okkar, evrópusamstarfsverkefni með Belgíu og Ungverjalandi.  Við hófum samstarfið með tveimur Evrópuvikum, settum upp Comeniusarhorn í sameiginlega rýminu okkar í salnum.  Þessar tvær vikur munum við hafa samverustundir í salnum og skoða saman evrópukortið, fána evrópulandanna og tengsl okkar við Evrópu.
Í lokin munum við svo gera hann Trölla okkar ferðbúinn og senda hann af stað í sitt fyrsta skiptinám til Wallonia í franska hluta Belgíu. 

Laugardaginn 16. ágúst verður haldið upp á 10 ára afmæli leikskólans með veglegri veislu og hefst hún klukkan 11:00.
Hátíðin hefst á því að farið verður í skrúðgöngu um hverfið, hoppukastalar verða í garðinum, góðir gestir munu koma í heimsókn og auðvitað verða grillaðar pylsur.

Vonumst til að sem flestir sjái sér fært að mæta!

Á dögunum fögnuðum við því að 5 af starfsmönnum leikskólans eiga 10 ára starfsafmæli.
Elín Mjöll, Hanna, Lilla, Sigga og Guðrún hafa unnið hér frá því að leikskólinn opnaði.

Til hamingju stelpur!

Á föstudaginn 20. júní héldum við veislu og kvöddum alla þá sem koma til með að hætta hjá okkur í sumar og í haust.
Við vorum með tónlist í garðinum í útivistinni og söngstund úti í brekku fyrir matinn. Í hádeginu var svo pylsupartý í salnum og ís í eftirrétt. Eftir hvíldina var svo bíó í salnum þar sem við horfðum á Pétur Pan á stóru tjaldi. Rúsínan í pylsuendanum var svo súkkulaðikaka að hætti Ásdísar í kaffitímanum. Eins og gefur að skilja var þetta alveg frábær dagur og ekki spillti góða veðrið.